Тошкентда USP билан минтақавий регуляторлар учрашуви ўтказилди: Марказ PAR дастурига қўшилди

2026-йил 29–30-сентябрь кунлари Тошкентдаги BioPharm City мажмуасида Фармацевтика маҳсулотлари хавфсизлиги маркази АҚШ фармакопеяси (USP) ҳамда Ўзбекистон Республикаси Тиббиёт ва фармацевтика тармоғини ривожлантириш агентлиги билан ҳамкорликда иккита халқаро тадбир ўтказди.

Минтақавий регулятор органлар учрашуви

29-сентябрь куни бўлиб ўтган CAC Regulatory Authorities Meeting учрашувида Ўзбекистон, Қозоғистон, Қирғизистон, Тожикистон, Туркия, Озарбайжон, Покистон, Миср, Иордания ва Польша регулятор органлари вакиллари ҳамда USP экспертлари иштирок этди. Учрашувда қуйидаги масалалар муҳокама қилинди:

• минтақавий регулятор ҳамкорлик ва бошқа органлар хулосаларига таяниш (reliance);
• фармакопея стандартлари, сифат тизимлари ва регулятор баҳолаш;
• биоэквивалентликка регулятор ёндашувлар, ЖССТ преквалификацияси ва сифати кафолатланган дори воситаларидан фойдаланиш имконияти.

USP билан Келишув хати

Учрашув доирасида Марказнинг USP нинг «Регуляторлар учун имтиёзли кириш» (Preferential Access for Regulators, PAR) дастурига қўшилиши тўғрисидаги Келишув хати имзоланди. Ҳужжатга мувофиқ:

• Марказ ва унинг лаборатория тармоғи (марказий лаборатория ва ҳудудий филиаллар) дори воситалари сифатини назорат қилишда фойдаланиладиган USP стандарт намуналаридан имтиёзли асосда фойдаланиш муддати узайтирилади;
• Марказ мутахассисларининг АҚШ фармакопеяси — Миллий формуляр (USP–NF) ва USP нинг бошқа меъёрий нашрларига онлайн кириш имконияти кенгаяди.

Тадбир доирасида Марказ директори Алишер Темиров хорижий регулятор органлар, халқаро ташкилотлар ва фармацевтика саноати вакиллари билан қатор икки томонлама учрашувлар ўтказди. Уларда халқаро ҳамкорликни кенгайтириш, илғор тажриба алмашиш ва мутахассислар салоҳиятини ошириш масалалари муҳокама қилинди.

USP фойдаланувчилари форуми

30-сентябрь куни фармацевтика корхоналари ва лабораториялари мутахассислари учун USP User Forum ўтказилди. Форумда USP умумий боблари, органик ва элемент аралашмалар ҳамда нитрозаминлар назорати, USP стандарт намуналари, аналитик методикалар валидацияси, биотехнологик дори воситаларининг барқарорлиги ва лабораториядаги номувофиқликларни бошқариш бўйича маърузалар тингланди.

Маълумот учун: USP–NF — АҚШ фармакопеяси ва Миллий формуляр, дори воситалари сифати стандартлари тўплами. Reliance — регулятор органнинг бошқа ишончли регулятор хулосаларига таяниб қарор қабул қилиши.

Манба: Фармацевтика маҳсулотлари хавфсизлиги маркази ва USP хабарлари.