Oʻzbekiston Nyu-Dehlidagi Jahon farmakopeyalari 15-xalqaro yigʻilishida ishtirok etdi

2025-yil 4–8-fevral kunlari Hindistonning Nyu-Dehli shahrida Jahon sogʻliqni saqlash tashkiloti (WHO) Xalqaro farmakopeyasi va Hindiston farmakopeya komissiyasi (IPC) hamkorligida Jahon farmakopeyalari 15-xalqaro yigʻilishi (15th International Meeting of the World Pharmacopoeias — IMWP) boʻlib oʻtdi. Anjumanda Oʻzbekiston Respublikasi Davlat farmakopeyasini ishlab chiqish boʻlimi boshligʻi X.K. Djalilov hamda boʻlim bosh mutaxassisi A.O. Zaynidinov ishtirok etdi.

IMWP platformasi Jahon sogʻliqni saqlash tashkilotining hududiy va milliy farmakopeyalari yetakchi vakillarini, xalqaro tashkilotlar va dunyoning turli mamlakatlaridan ekspertlarni, shuningdek Hindiston hukumati aʼzolarini bir dargohga jamladi. Bu esa Oʻzbekiston farmakopeya organiga jahon farmakopeya hamjamiyatining kun tartibidagi dolzarb masalalar bilan bevosita tanishish imkonini berdi.

Yigʻilishning ish kun tartibida farmatsevtika mahsulotlari sifatini taʼminlashning bir qator ustuvor masalalari koʻrib chiqildi:

• farmakopeya maqolalari va sinov usullarida yot aralashmalar hamda standart namunalarga oid masalalar;
• xavfli kimyoviy moddalardan foydalanish bilan bogʻliq yondashuvlar;
• «Uchta R» konsepsiyasiga muvofiq hayvonlarda oʻtkaziladigan sinovlardan bosqichma-bosqich voz kechish va ularni qisqartirish;
• jamoat sogʻligʻini saqlash sohasidagi favqulodda vaziyatlarda IMWP ning kelajakdagi yondashuvi.

Xalqaro hamkorlik doirasidagi muloqotlar chogʻida Yaponiyaning Farmatsevtika va tibbiy texnika agentligi (PMDA) — dori vositalari uchun farmakopeya va standartlar boʻlimi, ekspertizani boshqarish boshqarmasi direktori doktor Hikoichiro Maegawa bilan suhbat boʻlib oʻtdi. Suhbatda Oʻzbekistonning milliy farmakopeyani ishlab chiqish boʻyicha ishlari yuqori baholanib, kelgusida Davlat farmakopeyasini Farmakopeya diskussiya guruhi (PDG) aʼzoligiga qabul qilish taklifi qoʻllab-quvvatlandi.

Nyu-Dehlidagi anjumanda ishtirok etish Oʻzbekiston Davlat farmakopeyasining jahon farmakopeya hamjamiyati bilan hamkorligini mustahkamlash hamda yetakchi xalqaro farmakopeyalar bilan uygʻunlashtirish yoʻlidagi navbatdagi muhim qadam boʻldi.