Давлат фармакопеяси иккинчи нашрининг биринчи жилди тайёрланди: 450 га яқин умумий мақола халқаро стандартларга уйғунлаштирилди

Ўзбекистон Республикаси Давлат фармакопеясининг иккинчи нашри биринчи жилди тайёрланди. Жилд жами 450 га яқин умумий фармакопея мақоласини ўз ичига олади ва дунёнинг етакчи фармакопеялари — Жаҳон соғлиқни сақлаш ташкилотининг Халқаро фармакопеяси (Ph. Инт.), Европа фармакопеяси (Ph. Eur.) ҳамда Америка Қўшма Штатлари фармакопеяси (USP) билан уйғунлаштирилган ҳолда ишлаб чиқилди. Ҳужжатни тасдиқлаш учун буйруқ лойиҳаси Соғлиқни сақлаш вазирлигига тақдим этилди.

Жилд устидаги иш икки халқаро ҳужжатга таянди: “Фарматсевтика маҳсулотлари хавфсизлиги маркази” давлат муассасаси билан Европа фармакопеяси ўртасида тузилган — Давлат фармакопеясини яратишда Европа фармакопеяси матнларини нусхалаш ва уйғунлаштириш ҳуқуқини берувчи — келишувга, шунингдек АҚШ Фармакопея Конвенсияси (USP) билан имзоланган Қўшма Штатлар Фармакопеяси – Миллий формулярни қабул қилиш ҳуқуқлари тўғрисидаги шартнома ва Англашув меморандумига.

Мақолалар Европа фармакопеясининг 9–12-нашрлари оралиғидаги ўзгартишлар, қўшимчалар, чиқариб ташланган ҳамда амалда бўлган мақолаларнинг солиштирма таҳлили асосида танлаб олинди. Таҳлил ЭДҚМнинг Пҳармеуропа платформасидаги маʻлумотлар ва Европа Фармакопея Комиссияси мажлислари қарорларига асосланди. Биринчи жилд ишлаб чиқилганидан кейинги беш йил ичида Европа фармакопеясига 131 та янги монография киритилгани, 875 тасига ўзгартиш ва тўлдиришлар киритилгани, 37 таси эса амалдан чиқарилгани, улардан 6 таси бевосита Давлат фармакопеясига таʻаллуқли экани аниқланди.

Янги нашр биринчи жилдига жамланган асосий янгиланишлар қуйидагилардан иборат:

• Европа фармакопеясининг 17 та ва АҚШ фармакопеясининг 30 та янги мақоласи;
• Фармакопея дискуссия гуруҳи (PDG) доирасида Европа ва АҚШ фармакопеялари ўзаро уйғунлаштирган 17 та мақола ҳамда уларга муқобил сифатида USP тақдим этган 14 та мақола;
• 200 дан ортиқ тўлдириш ва ўзгартиш, шунингдек жилдга киритилган 4 мингга яқин реагентни уйғунлаштириш, ўзгартириш ва тўлдириш.

Жилдни тайёрлаш жараёнида Давлат фармакопеяси Таҳририят Ҳайʻати, Таҳририят Кенгаши ва Котибияти, шунингдек 11 йўналиш бўйича ихтисослашган эксперт комиссиялари ва уларнинг ишчи гуруҳлари 50 дан ортиқ йиғилиш ўтказди. Уларда 200 га яқин масала муҳокама қилиниб, 450 га яқин мақола лойиҳаси кўриб чиқилди ва экспертлар маʻқуллаганидан сўнг Давлат фармакопеясига киритишга тавсия этилди; жами 40 та йиғилиш баённомаси расмийлаштирилди.