Markaz mutaxassislari IPRP ishchi guruhlari tarkibiga qabul qilindi

2025-yil yanvaridan boshlab Davlat farmakopeyasini ishlab chiqish boʻlimining ikki bosh mutaxassisi — Azamat Mansurov va Akmalxoʻja Zaynidinov — Xalqaro farmatsevtika tartibga solish dasturi (IPRP, Jeneva, Shveytsariya)ning nufuzli ishchi guruhlari tarkibiga rasman qabul qilindi. Bu Oʻzbekiston farmakopeya organining global tartibga solish jarayonlariga bevosita jalb etilayotganidan dalolat beradi.

Mutaxassislar mos ravishda ikki alohida yoʻnalish boʻyicha ishchi guruhlarga biriktirildi: Azamat Mansurov «Sifat» boʻyicha ishchi guruh (QWG) tarkibiga, Akmalxoʻja Zaynidinov esa «Tibbiy mahsulotlarni identifikatsiya qilish» boʻyicha ishchi guruh (IDMPWG) tarkibiga kiritildi.

Aʼzolik davomida har ikki mutaxassis mazkur guruhlarning jami 10 dan ortiq yigʻilishida faol ishtirok etdi. Uchrashuvlar chogʻida ular xalqaro hamkasblarga «Farmatsevtika mahsulotlari xavfsizligi markazi» davlat muassasasining tuzilmasi hamda Davlat farmakopeyasini ishlab chiqish boʻlimi faoliyati toʻgʻrisida batafsil axborot taqdim etdi.

IPRP ishchi guruhlaridagi ishtirok Oʻzbekiston mutaxassislariga dunyoning yetakchi dori vositalarini tartibga soluvchi organlari bilan bevosita muloqot qilish, ilgʻor tajriba va meʼyoriy yondashuvlarni oʻrganish hamda milliy farmakopeyani xalqaro talablarga uygʻunlashtirish imkoniyatini kengaytiradi.