Oʻzbekiston Braziliyada Jahon farmakopeyalarining 16-xalqaro yigʻilishida ishtirok etdi

Oʻzbekiston Respublikasi Davlat farmakopeyasi delegatsiyasi 2026-yil 15–17-iyun kunlari Braziliya Federativ Respublikasining Brazilia shahrida oʻtkazilgan Jahon farmakopeyalarining 16-xalqaro yigʻilishida (16-IMWP) ishtirok etdi. Yigʻilish Jahon sogʻliqni saqlash tashkiloti (JSST) hamkorligida Braziliya farmakopeyasi (Farmacopeia Brasileira) va Braziliya sogʻliqni saqlashni nazorat qilish agentligi (ANVISA) tomonidan tashkil etilib, u Braziliya farmakopeyasining 100-yilligiga bagʻishlangan tantanali tadbirlar bilan bir vaqtda oʻtkazildi.

Oʻzbekiston Respublikasi Davlat farmakopeyasi va uning farmakopeya organi JSST Xalqaro farmakopeyasi aʼzosi boʻlib, JSSTning «Jahon farmakopeyalari va farmakopeya organlari indeksi»ga kiritilgan. Braziliya farmakopeyasi rahbari Thaís Corrêa Rocha xonimning rasmiy taklifiga binoan yigʻilishda Davlat farmakopeyasini ishlab chiqish boʻlimi boshligʻi, bosh muharrir, farmatsevtika fanlari doktori, professor X.K.Djalilov hamda boʻlim boshligʻi oʻrinbosari A.O.Zaynidinovdan iborat delegatsiya qatnashdi.

Gibrid shaklda (onlayn va oflayn) uch ish sessiyasida oʻtkazilgan yigʻilishda Braziliya, Britaniya, Yevropa, Hindiston, Yaponiya, Koreya, Meksika, Rossiya, Xitoy, Vetnam, AQSH va Oʻzbekiston farmakopeyalari vakillari, shuningdek JSST kotibiyati, ICH, EDQM, Yevroosiyo iqtisodiy komissiyasi va boshqa xalqaro tashkilotlar mutaxassislari ishtirok etdi. Oʻzbekiston delegatsiyasi milliy Davlat farmakopeyasini rivojlantirish, uni xalqaro darajada uygʻunlashtirish, ikkinchi nashrni tayyorlash hamda Farmakopeyaviy muhokama guruhi (PDG) aʼzoligiga tayyorgarlik boʻyicha olib borilayotgan ishlarni xalqaro ekspertlarga taqdim etdi.

Yigʻilish kun tartibida endotoksinlarni aniqlashning muqobil usullarini joriy etish hamda ICH yoʻriqnomalari asosida umumiy farmakopeya usullarini xalqaro darajada uygʻunlashtirish masalalariga alohida eʼtibor qaratildi. Uchinchi kun Braziliya farmakopeyasining 100-yilligiga bagʻishlanib, uning 8-nashri rasman taqdim etildi — mazkur nashrga 19 ta yangi monografiya kiritilgan, 122 ta monografiya qayta koʻrib chiqilgan va 200 dan ortiq mavzu yangilangan.

Asosiy natijalar

• Britaniya farmakopeyasi vakillari Oʻzbekiston delegatsiyasini komissiya yigʻilishlarida kuzatuvchi sifatida ishtirok etishga taklif qildi;
• Meksika farmakopeyasi oʻz farmakopeyasidan bepul foydalanish imkoniyatini taqdim etishga tayyorligini bildirdi;
• Braziliya farmakopeyasi amaldagi toʻrtta rasmiy nashrni Oʻzbekiston delegatsiyasiga elektron shaklda bepul foydalanish uchun taqdim etdi;
• IMWP Intilishlar hujjati (Aspirations), PDG faoliyati va ICH Q4B ilovalari orqali uygʻunlashtirish mexanizmlari oʻrganilib, ular PDG aʼzoligiga tayyorgarlik uchun muhim amaliy tajriba sifatida baholandi;
• endotoksin va pirogen sinovlarida hayvonlar ishtirokidagi usullarni zamonaviy muqobil metodlar bilan almashtirish boʻyicha yetakchi farmakopeyalarning ilgʻor tajribasi oʻrganildi.

Yigʻilishdagi ishtirok Oʻzbekiston Respublikasi Davlat farmakopeyasining xalqaro eʼtirofini mustahkamlash, yetakchi farmakopeyalar bilan hamkorlik aloqalarini kengaytirish hamda ikkinchi nashrni jahon standartlariga uygʻun tarzda takomillashtirishga muhim hissa qoʻshdi.