Марказ мутахассислари IPRP ишчи гуруҳлари таркибига қабул қилинди
2025-йил январидан бўлим бош мутахассислари Азамат Мансуров ва Акмалхўжа Зайнидинов IPRP (Женева)нинг QWG ва IDMPWG ишчи гуруҳларига аъзо бўлди.
2025-йил январидан бошлаб Давлат фармакопеясини ишлаб чиқиш бўлимининг икки бош мутахассиси — Азамат Мансуров ва Акмалхўжа Зайнидинов — Халқаро фарматсевтика тартибга солиш дастури (IPRP, Женева, Швейтсария)нинг нуфузли ишчи гуруҳлари таркибига расман қабул қилинди. Бу Ўзбекистон фармакопея органининг глобал тартибга солиш жараёнларига бевосита жалб этилаётганидан далолат беради.
Мутахассислар мос равишда икки алоҳида йўналиш бўйича ишчи гуруҳларга бириктирилди: Азамат Мансуров «Сифат» бўйича ишчи гуруҳ (QWG) таркибига, Акмалхўжа Зайнидинов эса «Тиббий маҳсулотларни идентификация қилиш» бўйича ишчи гуруҳ (IDMPWG) таркибига киритилди.
Аъзолик давомида ҳар икки мутахассис мазкур гуруҳларнинг жами 10 дан ортиқ йиғилишида фаол иштирок этди. Учрашувлар чоғида улар халқаро ҳамкасбларга «Фарматсевтика маҳсулотлари хавфсизлиги маркази» давлат муассасасининг тузилмаси ҳамда Давлат фармакопеясини ишлаб чиқиш бўлими фаолияти тўғрисида батафсил ахборот тақдим этди.
IPRP ишчи гуруҳларидаги иштирок Ўзбекистон мутахассисларига дунёнинг етакчи дори воситаларини тартибга солувчи органлари билан бевосита мулоқот қилиш, илғор тажриба ва меъёрий ёндашувларни ўрганиш ҳамда миллий фармакопеяни халқаро талабларга уйғунлаштириш имкониятини кенгайтиради.