Raqamli qulaylik va avlodlar integratsiyasi: Platformada lotincha matnlarni avtomatik kirillchaga oʻgirish funksiyasi ishga tushirildi
Matnlarning kirill yozuvidagi versiyasi transliteratsiya orqali avtomatik shakllantiriladi va maxsus belgi bilan koʻrsatiladi. Rasmiy matn — lotin yozuvidagi versiya.
Oʻzbekiston Respublikasi Davlat farmakopeyasi onlayn platformasida Tahririyat kengashi tomonidan verifikatsiya qilingan (tekshirilgan) kirill alifbosidagi matnlar versiyasini eʼlon qilish boshlandi.
Maʼlumki, farmatsevtika sohasidagi meʼyoriy va tahliliy jarayonlarning shaffofligini hamda aniqligini taʼminlash maqsadida platformadagi yagona rasmiy ilmiy-huquqiy manba lotin yozuvidagi matnlar hisoblanadi. Shu bilan birga, soha mutaxassislariga qulaylik yaratish va axborotdan foydalanish imkoniyatlarini kengaytirish maqsadida tizimga integratsiya qilingan avtomatik kirillcha matnlarni bosqichma-bosqich rasmiy verifikatsiyadan oʻtkazish ishlari olib borilmoqda.
Farmatsevtika sohasida katta tajribaga ega boʻlgan va koʻp yillar davomida sobiq ittifoq yoki MDH davlatlari tizimida ishlagan katta avlod mutaxassislari (farmatsevtlar, shifokorlar, provizorlar, olimlar) haligacha maʼlumotlarni kirill yozuvida tezroq qabul qilishadi. Tizim lotin alifbosida maʼlumotlarni tahlil qilishda qiyinchiliklarga duch keladigan mutaxassislarga ham axborotdan cheklanib qolmaslik imkonini beradi. Mazkur yangilik tibbiyot va farmatsevtika sohasida faoliyat yuritayotgan ikki avlod mutaxassislarini birlashtiradi. Bu lotin alifbosida taʼlim olgan yosh kadrlar va kirill yozuvida ulkan tajribaga ega boʻlgan katta yoshdagi olim-u provizorlarning muhim maʼlumotlarga birdek, tezkor va cheklovlarsiz kirishini taʼminlaydi.
Bugungi kunda Tahririyat kengashining malakali mutaxassislari tomonidan terminologik va ilmiy nazoratdan toʻliq oʻtkazilgan dastlabki monografiyalar hamda umumiy maqolalarning kirill yozuvidagi muqobillari tizimga joylashtirildi. Tahririyat tomonidan tasdiqlangan ushbu matnlar foydalanuvchilarga sifatli va xatosiz ilmiy manbadan foydalanish imkonini beradi.
Oʻzbekiston Respublikasi Davlat farmakopeyasi platformasida lotin va kirill yozuvlari oʻrtasidagi bunday oʻtish tizimining joriy etilishi — shunchaki texnik qulaylik emas, balki raqamli transformatsiya va milliy qonunchilik talablarini uygʻunlashtirgan oqilona strategik yechimdir.
Tahririyat tomonidan tekshirilgan kirill versiyalari paydo boʻlgach, avtomatik versiya almashtiriladi. Tizimdagi avtomatik shakllantirilgan qolgan matnlarni rasmiy tasdiqlangan variantlarga almashtirish jarayoni bosqichma-bosqich davom ettiriladi.
Tahririyat tomonidan tekshirilgan va tasdiqlangan yangi monografiyalar matni bilan platformaning «Matnlarga kirish» boʻlimi orqali tanishishingiz mumkin.