Davlat farmakopeyasi ikkinchi nashrining birinchi jildi tasdiqlandi
Sogʻliqni saqlash vazirining 2025-yil 29-dekabrdagi 404-son buyrugʻi bilan Davlat farmakopeyasi ikkinchi nashrining birinchi jildi tasdiqlandi; verstka yakunlanib, bosma va elektron loyiha tayyorlandi.
Oʻzbekiston Respublikasi Sogʻliqni saqlash vaziri 2025-yil 29-dekabrda «Oʻzbekiston Respublikasi Davlat farmakopeyasi ikkinchi nashri birinchi jildini tasdiqlash toʻgʻrisida»gi 404-son buyruqni imzoladi. Ushbu hujjat ijrosini taʼminlash doirasida 2026-yilning birinchi yarmida (yanvar–iyun oylari) Davlat farmakopeyasini ishlab chiqish boʻlimi ikkinchi nashr birinchi jildining sahifalash (verstka) ishlarini yakunladi hamda uning elektron shakldagi loyihasini tayyorladi.
Jildga tayyorgarlik jarayonida keng koʻlamli tarjima va tahrir ishlari amalga oshirildi. Xususan, birinchi jildga kiritilishi rejalashtirilgan Yevropa farmakopeyasining 334 ta monografiyasi, Davlat farmakopeyasi birinchi nashri ilovasiga kiritilgan 51 ta monografiya, shuningdek AQSH Farmakopeyasi (USP)ning 9–12-nashrlari oraligʻidagi 22 ta monografiyaga kiritilgan oʻzgartirish, toʻldirish va chiqarib tashlangan matnlar boʻyicha ishlar toʻliq yakuniga yetkazildi.
Shu bilan birga, birinchi jildni bosma (kitob) va elektron shaklda nashr etish uchun texnik topshiriq loyihasi ishlab chiqildi. Bu esa nashrni ham anʼanaviy bosma, ham zamonaviy elektron koʻrinishda foydalanuvchilarga yetkazish imkonini beradi.
Yangi nashrni amaliyotga joriy etishga tayyorgarlik doirasida 2026-yil 12-fevral kuni «Davlat farmakopeyasining 2-nashri: xalqaro va zamonaviy talablar uygʻunligining yangi bosqichi» mavzusida vebinar shaklida maxsus seminar mashgʻuloti tashkil etildi. Unga mahalliy dori vositalarini yaratish boʻyicha ilmiy-tadqiqot olib boruvchi tashkilotlar, shuningdek dori vositalari va tibbiy jihozlarni ishlab chiqaruvchi hamda ular sifatini nazorat qiluvchi muassasalarning mutasaddi xodimlari jalb etildi.
Davlat farmakopeyasi ikkinchi nashrining birinchi jildi milliy farmakopeyani Yevropa farmakopeyasi va AQSH Farmakopeyasi kabi yetakchi xalqaro farmakopeyalar bilan uygʻunlashtirish yoʻlidagi muhim qadam boʻlib, mamlakatda dori vositalari sifatini taʼminlashning meʼyoriy asosini yanada mustahkamlaydi.
